Ez-Ohiko plenoa 2018-02-23

Bertaratuak: Eusebio Larrazabal Olabarri, Felipe Agirrezabala Agirrezabala, Eneritz Iza Uriarte, Gurutze Etxebarria Zuluaga, Zedarri Jauregi Manterola, Irati Urien Ortuzar eta Arkaitz Estiballes Ormaetxea.

Idazkaria: Ana Mari Bengoetxea Lejarza.

1.- 2018ko Aurrekontuaren azterketa eta onarpena, halan badagokio.

Alkateak EH Bildu udal taldeari berbea emoten deutso 2018ko aurrekontu proiektuari aurkeztu deutsozan osoko zuzenketa eta zuzuenketa partzialak azaldu dagizan.

EH Bildu udal taldeak azalduten dau osoko zuzenketa aurkeztu dauala, alde batetik, formak ez direlako jagon. Aurrekontu hau ez dala ez herriagaz ez EH Bildugaz egin, proiektua egin eta gero erakutsi jakola esaten dau EH Bilduk. Gaineratuten dau eduki aldetik legeak jarrita daukazan epeak ez dirala errespetau; eta, txostenean, akatsak dagozala, programa-talde batzuk falta dirala edo ez dagozala zuzen. Diru sarrerak ataleko, zeharkako zergak puntuan, ez dala argi gelditan zein dan kontuan hartuko diran kantidadeak dino EH Bilduk, hainbat partidatan ez dala 2017ko gastu erreala kontuan hartu, nahiz eta txostenean kontrakoa esan. Galdetuten dau EH Bilduk inbersinoak errealak diran eta egiteko aurreikusten diran dirulaguntzak ziurtatuta dagozan. Plazearen berrantolaketaren kasuen aurreikusten diran dirulaguntzak gastua baino handiagoak dirala be badino EH Bilduk, eta ia hori posible dan galdetuten dau eta dino dana dala, inbersino horreen proiektu teknikorik ez dala aurkeztu. EH Bilduk dino txostenean azaltzen dala lan eskaintzarik ez dala egongo, baina era berean kulturarako administrari laguntzaile bat kontratatzeko programa sortuten dala eta horretara,   jakin gurako leukela zelan esleituko dan lanpostu hori eta zeintzuk izango diran kontratu horren zehaztasunak.

Galdetuten dau be bai Zeanuriko Musika Eskola Arratiako Musika Eskolan sartu bada, legezkoa dan Zeanuriko Musika Eskolaren izenean dirulaguntzak eskatzea, jakinda musika eskolarik ez dagoala. 1996an Eusko Jaurlaritzak esan ebala jantza ezin dala izan musika eskolako arloa.

Jarraituteko, EH Bildu udal taldeak brigadako egitura barruan beste langile baten kontratazioa beharrezkotzat jotzen dau, arlo horretan sortuten diran aparteko lan orduak eta gastuak ikusirik.

EH Bilduk mahaigaineratuten dau plangintza orokorra falta dala:

·         SANEAMENDUAri lehentasuna emon behar jakola. Proposatuten dau diruzaintzako izakin likidoa (erremanentea) plan hau gauzatuteko erabilitea, maileguak eta hornitzaileakaz zorrak, egon balegoz, kendu eta gero.

·         BASO USTIAKETA eta BIRLANDAKETA. Herriko basoen plangintza eta inbentario eskatzen dau. 

·         ELEKTRA INDARRA. Gastuen partidak bajatu arren energia erabilera optimizatzeko planaren beharra dagoala udal eraikuntzetan zein argi publikoan.

·         IRISGARRITASUNA. Herritarrok hainbat udal eraikuntzetara hurbiltzeko oztopo handiak daukaguzala, adibidez, udaletxera, correos bulegora, kanposantura…

·         3. ADINEKOAK. Partida handitu arren ez dagoala plangintzarik.

·         UGER EGITEKO TOKIE. Proiektu hau be falta dala.

·         LIBURUTEGIAREN BERRANTOLAKETA. Zein da proiektua?

·         IBARRETAKO ETXEBIZITZA SOZIALA. Zein da aurreikusita dagoan plana, erabilera aldetik eta arkitektonikoki?

·         HERRIKO GUNE EZBERDINEN BERRANTOLAKETAren plan orokorra falta dala. Zeanuriko EH Bilduren ustez prozesu parte hartzaile baten bidez egin beharreko planak dirala.

Ikerketa eta lan teknikoak partidak dirala eta, Zeanuriko EH Bilduk behin eta barriro bere desadostasuna azaldu dau horrenbesteko gastu partiden aurrean ((37.500€ eta 30.000€). EH Bildu udal taldeak bere proposamena baten baino gehiagotan egin dau, kontuan hartua izan ez dana.

EH Bilduk jarraituten dau esanez txostenean azalduten dala dirulaguntza batzuk emateko dirulaguntzei buruzko ordenantzetan oinarrituta emongo dirala, baina ez dirala aipatuten indarrean dagozan ordenantza guztiak eta ordenantzarik ez dagoan kasuetan ez dala azalduten zein dan erabiliko dan prozedurea: Ikasle garraiodunak, familiei dirulaguntzak, hirugarren munduko dirulaguntzak, hirugarren adina bidaia, ermitek... Taulari beste zutabe bat gehitu behar jakola be badino, araubidea eta prozedura jarriz.

Talde kulturalai subenzinoak emoteko indarrean dagoan ordenantzea ez dala aipatuten dino EH Bilduk. Eta azpimarrautu beharra dagoala, Arartekoak baten baino gehiagotan esan dauala ordenantza horrek ez dauala objetibotasunik eta gardentasunik bermatuten.

Zeanuriko EH Bildu udal taldeak ezin dau aurrekontu proiektu hau onartu, objektibotasuna, bardintasuna, publizidadea, gardentasuna, elkar lehia, bereizkeriarik eza, efikazia eta eragingarritasuna bermatzen ez diralako.

Gastu orokorretarako diruzaintzako izakina, EH Bildu udal taldearen ustez, diru hori, legeak gomendatzen dauan moduan, ekintza honeetarako erabili beharko zan:

 - BBVAgaz daukaguzan mailegu bien ordainketa osoa egiteko, hau da,   25.666,83+121.226,03= 146.892,86€ko zorra kentzeko.

 - Hornitzaileakaz zorren bat balego, ordainketak egiteko.

 - Herriko saneamendua egiteko plan orokorra eta epe ertaineko bat behar da. Inbersino hau ezinbestekotzat joten dogu, alkarlanean abiatuteko derigorrezkotzat doguna.

EH Bilduk udalak herria herritarrakaz batera egin beharko leukela dino, parte-hartzeari ateak zabalduz, herriko ebatzietan zeresaneko eskubidea bermatuz. Zer esanik ez, udal taldeen artean adostasunak lortuz. Eta dino, guzti hori aurrekontu proiektu hau aurrera aterateko ez dala kontuan hartu. Halanda be, prest agertuten dala batu eta alkarlanerako.

Aipatu diran arrazoi guztiakaitik, EH Bilduk aurrekontu proiektu hau atzera bota eta barriro be erizpide barriak kontuan hartuta, berraztertutea proposatuten dau.

Idazkariak hartzen dau berbea esanez egia dala akats tekniko batzuk egon dirana baina zuzenduteko modukoak dirala eta halan egingo dala. Alkateak dino adostasunera heltzeako aukerea dagoala, eta herritarrakaz egoten dirala. Aurrekontua beharrizanetara enfokauta dagoala dino alkateak. Jarraituten dau onartuz epeak ez dirala bete baina esaten dau hori ez dala arazoa aurrekontua onartuteko. Ugerlekuari jagokonez, alkateak dino torreko landetan eitea pentsauta daukiela, baina arazoak dagozala. Beste gauze batzuen artean, alkateak dino jaietan desbiazinoak egon dirala eta ahaleginduko dirala dagozan partidetara egokituten. Inbersinoak dirala eta, alkateak dino prebisino bat dirala, ez dakiela egingo diran ala ez eta egia dala inbersino batzuk zalantzan ipini leikezala, batez be hasteko epeagaz. Honegaz lotuta EH Bilduk galdetuten dau ia zeintzuk diran inaugurazino eta hauteskundean arteko jagon beharreko epeak; idazkariak erantzuten dau begituko dauala.

San Migeleko ermitea dala eta, alkateak azalduten dau erostearen arrazoia beste formularik topetan ez dabelako dala, ez dagoala entidaderik ermitea erosteko moduan; atipikoa dan arren, soluzinoa emoteko bide bat dala. EH Bilduk lan eskaintza dala eta egiten dauan zuzenketa eta proposamenaren harira alkateak dino kultur teknikariak administrazinoko arloa eta kultura eroango dituela, lanpoltsa zabalduko dala eta neurtuten danean lanpostu eskaintza egingo dala; brigadaren kasuan, EH Bilduk egiten dauan zuzenketa partziala onartuten da, beste pertsona bat kontratetea hain zuzen be, eta lan eskaintza dala eta begituko dala zelan egin leiken erantzuten dau EAJk. Irisgarritasunaren gaiagaitik alkateak dino kontuan hartzeakoa dala EH Bilduren zuzenketea. Alkateak hurrengo aipatzen dauana Ibarretako etxebizitzea da, eta kontetan dau mankomunidadetik kudeatuko dala etxebizitza sozial moduan, Lemoako eta Areatzako beste etxe banagaz lez. Ikerketa eta lan teknikoak, hau da, arkitektoaren gastua dala eta, alkateak dino momentu honetan ez dala aldatuko. EH Bilduk aipatutako herriko plangintzen falteagaitik alkateak dino gatxa dala besteak beste legislatura batetik bestera desbardintasunak egon leikezalako. Dirulaguntzari buruz alkateak dino garraiodunena hortik egon behar dala, topau egin beharko litekela, 3. adineko bidaiarenerako ez leukiela ordenantzarik egingo, ermitak dirala eta ez dagoala ordenantzarik dino, eta ondare kulturala dala eta ez litekela erraza izango kasuistikeagaitik. EH Bilduren galderari, hain zuzen be Begituri 2017ko dirulaguntza zergaitik ez jakon emon, ahaztu egingo jakela esaten jako. Arartekoarenaren harira alkateak adierazten dau esan beharrekoa esanda dagoala eta gomendioa ez dabela kontutan eukiko.

Ondoren, EH Bilduk aurkeztu dauzan zuzenketa partzialen artean batzuk onartuten dira. Adibidez:

- Erregaien hornidura eta telefonian aurrekontu desbardinak eskatu eta aukerarik onena hartzea.

- Brigadarako lanpostu barri bat.

- Ondare kulturalaren (iturriak, errotak...) berreskurapenerako partida zabaldutea.

- Putzu septikoetarako partida barriro be ipintea.

- Bideetarako neguko plana.

EH Bilduk aurkeztutako zuzenketa partzialetatik onartu ez zirenak ostera:

- Eleizaren eraikuntzak, kultorako ez diranak, beste herritarran moduan zergak ordaintzea.

- Iberdrolak eta uren partzuergoak obra barrien zergak ordaindutea.

- Orain Zeanuriko Musika Eskola ez dagoanez, Arratiko Musika Eskolan sartu zalako, ezin da dirusarrera moduan aurreikusi Eusko Jaurlaritzatik hartzean zan dirulaguntza. Horregaitik, partida hori ez kontenpletea.

- Publizitatea eta propaganda. Behar izanaren arabera egitea gastua, ez kontratu baten barruan.

- 3. adinekoentzako aktibitateatarako lanpoltsa bat zabaldutea.

- Udalbiltza. Partida zabaltzea.

- Gorbeialdetik urtetea.

- Errefuxiatuentzako dirulaguntzak sortzea.

 2018ko aurrekontua onartu egiten da EAJ-PNVren aldeko 5 botoakaz. EH Bilduk kontrako 3 boto emoten deutsoz.