XOROKIL HARROBIA

Xorokil Harrobiaren erauzketa eta ustiapena egiteko, jarduera sailkatuaren argitalpenaren aurrean Zeanuriko EHBildu udal taldeak,

zera adierazten dau:

- Bizkaiko Aldizkari Ofizialean, 81.zenbakien 2014ko apirilaren 30ean Cantera de Zeanuri, S.L.-ak Zeanurin Xorokil Harrobiaren erauzketa eta ustiapena egiteko Jarduera Sailkatuaren lizentzia eskatu dauela argitaratu dala.

Lizentzia eskaera honen aurrean ondorengo kontrako arrazoibideak aurkezten ditu:

- Ez dala bete 3/1998 Legeak, otsailaren 27koak, Euskal Herriko Ingurugiroa babesteko Lege Orokorrak, bere 58.1 atalean adierazten dauena: “hirigintzako planetan edo udal-ordenantzetan oinarrituta udal-eskumenengatik jarduera-lizentzia espreski ukatzea ez dagokionean, alkateak 15 eguneko epearen barruan jarduera ezartzeko eskearen espedientea jendaurrean jarriko du, BAOn argitaratuz, eta pertsonalki jakinaraziko diela ezarriko dan lekuko inguruko auzotarrei”.

Espediente honetan interesatu moduan agertzen direnak, eta lekuko auzotarrak, ez dira erauzketa eta ustiapen lizentzia eskaera honen jakinaren gainean jarri modu pertsonalean. Informazioa ez zabaltzea, informazio eskubidearen kontra doa, are gehiago interes kontrajarriak daudenean. Jarduera honek eragin zuzena izango luke gaur egun inguruan dauden beste jarduera batzuengan, biztanleak, abeltzaintza, turismo jarduera, beste batzuen artean.

- 3/1998 legeak, otsailaren 27koak, ingurugiro-politikarako oinarriak jartzen dituela. 1. atalean 2. puntuan lege honen xedea adierazten da “aireak, urak, lurzoruak, paisajeak, flora eta fauna, beren parametroa eta elkarrekintza egokiekin, giza bizia garatzen deneko ingurugiroa osatzen dute. Era jasangarrian erabiliko da”.

2. atalean, legearen helburuak, b puntuan esaten da “biodibertsitatea mantentzea, bere osagaiak ingurugiro baliabideak erabilita sortzen diren irabaziak era zuzen eta bidezkoan banatzeko era jasangarrian erabiltzen direla zainduz”.

2. atalean, legearen helburuak, c puntuan agertzen da “edozein ingurunetan bizi direla ere, euskal herritarren bizi-kalitatea hobetzea”.

2. atalean, legearen helburuak, d puntuan adierazten da “ingurugiroa babestea, kalteak prebenitzea eta kaltetu den lekuan leheneratzea”.

2. atalean, legearen helburuak, e puntuan adierazten da “ingurugiroko eraginak minimizatzea, jardueren ondorioak aurrez ebaluatuz eta zuzentzeko neurriak ezarriz”.

- Inguruan bizi diren herritarrak kaltetuak izango direla, airea, ura, zarata, kutsadura… jasan beharko luketelako. Eskatzen dugu, legean oinarrituz, zarata dela-eta ikerketa zehatza egitea kontuan hartuta bertan egongo diren makinaria guztia, baita ere eztanden ondorioak.

-          Bertako biodibertsitatea babestua izan beharrean, legeak behartzen dauen legez, urratua izango da:

o   Hiru hezegune desagertuko dira jarduera hau dela eta. Ondoan dagoen hezegunea, Saldrapoko biotopoan, kaltetua izan daiteke ere.

o   Xorokil, Angoiti eta batez ere Undabe errekatxoa, zeinek ur edangarria daroan, eta bere urak Zadorra urtegira doazen, harrobi honen jardueraren ondorio larriak jasango dituzte, bai ur lohien isurketa, zein bertako urak batzea.

o   Undabe errekatxure isurketarik egiteko baimenik ez dagoela.

o   Pagadia, 4 hektarea duena eta herriko patrimonioaren parte dena, ustiatu egin beharko da.

o   Faunari dagokionez, azpimarratzekoa da euskal erkidegoko desagertzeko zorian dagozan katalogoan zerrendaturiko hainbat animali ere desagertuko liratekeela. Hain zuzen ere mesotriton alpestris, mustela lutreola, ferra sagu-zahar handia eta ferra sagu-zaharra beste batzuen artean. Esan beharra dago haitzuloetako faunaren estudioa oraindik egin gabe dagoela.

o   Eguzkiola koba (Balizko Arkeologia Guneen Izendapenean agertzen dena, EHAA, 109 zenbakia, 1997ko, ekainaren 10ean) eta Xorokil kobetako estudioa bere osotasunean egin gabe dago (hidrologikoa, geologikoa…). Ezin da baztertu beste kobaren bat ere egotea inguru horretan, kontuan hartuta orain arte agertu direnak.

o   Harrobia Gorbeiako Parke Naturalaren mugan kokatua izango da. Gorbeia eta Urkiola korridore ekologikoaren zati handi bat hartzen du, eta era bat oztopatuko luke korridore horren funtsa.

- Kontraesan handia dago orain dela hilabete gutxi Zeanuriko Udalak Selvaventura S.L.-rekin kontratua sinatzea, zeinetan espreski aipatzen da: “el proyecto de instalación de cabañas en los árboles conlleva la colocación de cabañas aéreas suspendidas de los árboles y busca ofrecer un servicio de alojamiento en contacto con la naturaleza”, eta orain bertatik hurbilera harrobi bat zabaltzeko baimena emateko prest agertzea. Ze interes dago honetan?

- Turismoa bultzatu beharra argi agertu izan da orain arte, baina ezin da albo batera utzi gure herriko hainbat jende abeltzaintzatik bizi dela eta harrobi hau kokatuko dan lekutik oso hurbil dutela euren ogibidea lantzeko tokia. Beste kontraesan handi bat da, basoak ustiatu eta Europatik diru laguntzak jasotzeko hainbat hektarea pastizal bihurtu behar direla eta alboan harrobi bat zabaltzea.

Gure herriaren baliabiderik handienetakoa natura da. Zeanuri beti izan da mendizaleen arteko abiapuntu garrantzitsua eta ezaguna. Gorbeia eta inguruak izen handikoak dira mundu horretan. Zer nahi da, ekintza hori asteburuetara bakarrik bultzatzea? Inork ez luke nahi ibilbide baketsuan eztandarik entzutea, ez eta horren ondorioz hautsik arnastea. Hau da gure herrian turismoa bultzatu edo/eta indartzeko dugun era?

Arrazoi guzti hauen aurrean Zeanuriko EHBildu udal taldeak zera eskatzen dau:

-          Aurkeztutako  alegazioak aintzakotzat hartzea.

-          Xorokil Harrobiaren erauzketa eta ustiapena egiteko, jarduera sailkatuaren lizentziarik ez ematea.

Zeanurin, 2014ko maiatzaren 29an.