EKAINAK 10EKO OHIKO PLENOA

1.- Aurreko plenoen akten onarpena.

·         2016ko apirilaren 16ko eta apirilaren 22ko (ez ohikoa) aktak onartuten dira.

·         EH Bilduk zuzenketak egiten deutseez 2016ko otsailaren 19ko, martxoaren 4ko, apirilaren 22ko (ohikoa) eta maiatzaren 13ko aktai. Azken bi honeei EAJ-PNVk be zuzenketak egiten deutsaz.

2.- Lurzoru publikoa erabilteko ordenantzea: erabilera orokorra, txosnak eta antzekoen kasu berezia eta udal lokalen erabilerea. Agiriaren hasikerako onarpenaren azterketea.

Gaia eztabaidatuten hasi aurretik alkateak dino aldaketa batzuk egin deutsiezala ordenantzeari:

-       3.2 atalean “bigarren txozna honek be jaien finantziazinoan lagundu beharko leuke 1.000,00€tan” izan beharrean “700€tan” izango dala. Eta “Bigarren txozna hau beste ekintza bereziren bat dala eta jarriko balitz… 500,00€/eguneko”-ren ordez “200€/eguneko” jarriko dala.

-       8.1 atalean “Udalean 300€tako fiantza izanaren ziurtagiria” dala eta, alkateak eta kultura zinegotziak eretxi desbardinak daukiez, atzenean mantentzea ebazten dabe.

-       12. artikulua: udal lokalen erabilereari buruzkoa, atzen puntuari gehitu egiten deutsee “Ezin izango dira aste barruan udal lokalak eskatu erabilera politikoa daben batzarretarako, urtean 3 aldiz baino gehiagotan”. Alkateak gaineratuten dau “asteburuetarako printzipioz ez dago pegarik”.

Alkateak azalduten dau ordenantza hau lur publikoa erabilteko araudi ”tramite” txiki bat dala argituteko lur publikoa eta udal lokalak zelan erabili behar diran. Beste arrazoi bat dala txosnearen erabilerea “korregidu, kontrolau” egiteko. Gaineratuten dau hurrengo plenoko gai bat pankartak eta lurren okupazinoa araututen dauan ordenantzea izango dala. Gaur egun indarrean dagoanari aldaketa “txikitxo” bat egingo deutsiela.

EH Bilduren ustez ordenantza honen helburua (“lurzoru publikoaren erabilerea eta baita be udal lokalak erabilteko erispideak ezartzea da, guzti hau, erabilera orekatua, begirunez egindakoa, plurala eta anitza egiteko”) eta mamia ez datoz bat, lurzoru publikoaren erabilera orokorrari buruz zehaztapenik ez dagoalako. Aitatzen dan oreka        ez da inon ikusten. Sumatzen dan helburu bakarra da gaur egun gobernuan dagoan sensibilidade politikoak (EAJ-PNV-ek) sensibilidade desbardinai ateak zarratutea, herrian agertuteari aukerak kentzea.

Ordenantzeak dino “erabilera modu orokorrean udalean eskatu beharko da”, baina ez dau esaten ez nork ez zertarako eskatu beharko dan, adibidez, tabernak terrazak ipinteko eskatu beharko leukie?

Ordenantzako 3. artikulua: Txoznak. 1.1 atalean dino “txozna bakarra jarriko da”, nahiz eta Jai Batzordeko kideak, behin eta barriro, txosna bat baino gehiago egotearen alde agertu. EH Bilduk ez dau ulertuten Jai Batzordeak ipinten dauan txosnatik aparte besteren bat ipini ezkero, honek/honeek 1.000€, azken momentuko aldaketeagaz 700€ ipini beharra. Alkateak erantzuten dau horren arrazoia dala Jai Batzordeko txosneari eragingo jakon galerea konpensetako dala. Arrazoi bardinagaitik ekintza bereziren baten kasuan eguneko 500€, azken aldaketeagaz 200€, ordaindu behar dala. EH Bilduk jakin gure dau herriko tabernak jaietan kanpoan barra ipinten dabenean jaiak finantziau beharko dabezan kantidade horreek ordainduz. Alkateak ezetz erantzuten dau. Galdetuten jako ia San Isidroetan taloak saltzean dituan txosneak ordaindu beharko dauan. Alkateak dino txosna bakarra danez, ezetz.

Ordenantzako 3.4 puntuak dino “Leku irekian… Zeanuriko Udalak ezarritako azalera okupatuko du”, baina ez da esaten zein dan azalera hori ez zein dan txosnak ipinteko lekua.

Ordenantzako 4.2 puntuak dino “18 urtetik beherakoak txosna barruan egotea eta lan egitea ere debekatuta geratzen da”. Galdetuten da debeku horren zergaitia, legeak aukerea emoten dauanean 16 urtetik aurrera lan egiteko. Alkateak erantzuten dau arau hori ipini dala kontuan harturta 18 urtetik beherakoei ezin jakiela alkoholdun edaberik saldu.

4.3 puntuak dino “Edalontziak eta zerbitzurako honelako tresnak, baten bakarrik erabiltzekoak eta biodegradableak izango dira”. Honen aurrean EH Bilduk proposatuten dau ez baztertutea behin betiko edalontziak saltzearen aukerea, hainbat lekutan egiten dan moduan, plastiko gitxiago erabilteko. Kontuan eukiko dala erantzuten jako.

7.1  puntuan esaten da “Ez dira alderdi politikoen izenean eskatzen diren txosna eskariak tramitatuko”. “… txosnaren erabilera politikorik ez da egingo (propaganda, kartelak…”). Galdetuten da zer dan politika eta ia, adibidez,  Fracking ez!, Ongi Etorri Errefuxiatuak!, Gure Esku Dago!, Presoak etxera… pankartak politika diran. Ezetz dino alkateak.

Galdetuten da 8. artikuluan aitatuten diran ziurtagiriak txosna guztiak aurkeztu beharko dabezan: 300€ fiantza jarri izanarena, segurtasun, sendotasun eta garbitasunarena, Industriako Lurralde ordezkaritzak luzatutako instalazio elektrikoaren boletina, argi indarrera lotzeko baimena, suteen kontrako babesa: jarritako itzalgailu mota eta zenbakia zehastea, frankiziarik gabeko erantzukizun zibileko poliza, persona erantzulearen identifikazioa, Zeanuriko udalagaz zorrik ez izatearena.

Lege hausteak artikuluan, 9.3  h) atalean agertzen da “Pertsonen duintasunaren kontrako kartelak edota sinboloak erabiltzea, terrorismo goraltzen dutenak eta, ondorioz, elkarbizitza edo jai-ekitaldien normaltasuna arriskuan jarri dezaketenek”.

EH Bilduk jakin gura dau nork eta zelan ebatziko dan zer dan duina, zer dan alkarbizitzan normaltasuna, “terrorismoa”… Ez da erantzun zehatzik emoten.

Zigorrak dirala eta 10. artikuluan aitatuten da instruktore bat izentauko dala. Galdetzen da nor izango dan edo ze perfil izango dauan baina ez da erantzun zehatzik emoten.

           

11. artikuluan araututen da Jaiak eta Hauteskundeak: “jai egun edo ekintza bereziren baten ospakizunak hauteskunde kanpainagaz bat egiten badau, jaiak lehentasuna izango dau, eta data horretan ezin izango da, jaialdiaren esparruan, hauteskunde kanpaina burutzeko inongo instalaziorik jarri edo dagozanak horretarako erabili”.

EH Bilduren eretxiz Junta Elektoralak ezartzen dauana arau honen gainetik dago. Alkateak dino jaietan hauteskunde kanpainako ekitaldirik ezin izango dala egin jai lekuan.

12. artikulua: Udal lokalen erabilera araututen dauan honetan “lokalaren erabilera Zeanuriko herritarren probetxurako izan daitekeen ekintza baterako izango da” jarrita dago. EH Bilduk jakin gura dau zer dan “probetxurako”. Alkateak erantzuten dau Zeanurigaz zerikusia daukan ekintza dala.

Artikulu honetan jarrita dago “Ezin izango dira, aste barruan, udal lokalak eskatu erabilera politikoa daben bileretarako, urtean 3 aldiz baino gehiagotan”. EH Bilduk ez dau ulertuten erabilera mugatutea kasu batzuetan bakarrik.

Esandako guztiari gaineratuten deutso erderazko bersinoan hizkuntza sexistea  zuzendu beharra.

EH Bilduren ustez ordenantza hau gehiago da erantzun bat EAJren gustuko ez ziran igazko ekintza biri, hau da, EH Bilduk hauteskunde kanpainea dala eta San Isidroetako ferian stand-a ipintea eta Andra Marietan txosnea ipintea; atzenean batzuri ezezkoa emotea, herrian sensibilidade politiko bat ikusi ez daiten, “erabilera orekatua, begirunez egindakoa, plurala eta anitza” izatea baino. Gaineratuten dau txosna inguruko ordenantza, Jai Batzordeagaz adostua izan beharko zala.

Herritar batek berbea eskatuten dau esateko Jai Batzordean gai honeri buruz ez zala ezer aitatu, nahiz eta berak atzen batzarraren amaieran mahai gaineratu gura. Kultura zinegotziari eskatu eutsola ordenantzea batzordeko kide guztiai agindutea. Ikustean ondino ez ebala hori egin beronek agindu ebala. Honeri kultura zinegotziak erantzuten deutso agindu ebala baina inok ez dauala ekarpenik egin. Erantzuten jako nahi izan ezkero ekarpenak entzuteko aukerarik onena batzordeko batzarra izan zala. Herritarraren eretxiz jaiakaz zerikusia daukanak Jai Batzordean tratau beharrekoa dala.

Ordenantzea onartuten da EAJ-PNV-ren aldeko 5 botakaz, EH Bilduko 4 zinegotziak kontra botetan dabe.

3.- Ondasun Higiezinen gaineko zergari buruzko maiatzaren 18ko 4/2016 Foru-Arauaren onapena dala eta, karga-tasa barriaren onarpena.

Alkateak azalduten dau katastroaren gaurkotuteak dakarrela IBI-a be eguneratu beharra. Kalifikazino desbardinak dagozala: rustika, urbana eta bereziak. Azken talde honetakoak Iberdrola, Partzuergoa… dira. Proposatuten dau honeen balorea orain arteko bardina izatea eta kasu guztietan %0,07ko igoerea apliketea.

EH Bilduk proposatuten dau:

-       Etxe hutsai errekargoren bat ipintea, nahiz eta ahal dan topea ipini ez, beste herri batzuetan egin dan modura. Alokairu sozialerako udaletxeari eskeintzen bajakoz, zerga hori kentzea. Alkateak dino guztientzako %0,07 izango dala.

-       Bonifikazinoak mantentzea. Alkateak erantzuten dau egon diranak manteniduko dirala, famili ugariena izan ezik, legez orain baimenduta ez dagoalako.

-       Iberdrolari, Partzuergoari… legeak baimenduten dauan gehiengo %-a ipintea, hau da, %3a. Galdetuten dau Iberdrolak, Partzuergoak… zenbat ordaindu izan daben. Alkateak erantzuten dau %0,55 izan dala.

Botazinora joanda, ordenantza onartuten da EAJ-PNVren 5 aldeko botoakaz. EH Bilduk kontrako 4 boto emoten deutsoz.

EH Bilduren proposamenak ez dira onartuten EAJ-PNVk 5 kontrako boto emoten deutsoz, EH Bilduk lau botogaz alde botetan dau.

 

4.- EHBildu-ko fracking-aren inguruan herri borondatea defendiduteko aurkezten dauan mozinoaren azterketea eta onarpena, halan bajagoko.

EH Bilduk aitatuten dau EAJ-PNVren mozinoak “forma akatsa” daukala, bertan aitatuten dan legea uztailekoa ez dalako, ekainekoa baino. Gaineratuten dau EH Bilduk aurkeztutako mozinoaren helburua ez dala fracking-ari bai edo ez esatea, baizik eta eskatutea Parlamentuan demokratikoki onartutako legea errespetetea. Gogora dakar aurreko legegintzaldian mozino bi onartu zirala fracking ez-aren aldekoak. Proposatuten dau EAJ-PNVk aurkeztutako mozinoari lehenengo puntu biak kentzea, beste guztiakaz bat datozala, EH Bilduk aurkeztutako mozinoagaz bat datozelako.

Mahai gainean geldituten da.

5.- EAJ-PNVk fracking-ari buruz aurkeztutako mozinoa.                                            

 Mahai gainean geldituten da.

6.- Errefujiaduen alde aurkeztutako mozinoaren eztabaidea eta onarpena.

Alkateak dino EAJ-PNV absteniduko dala. Kultura zinegotziek dino gai honeri buruz iraileko plenoan eztabaidatu zala, alkateak dino ez dabela ikusten barriro honetaz berbaz hastea. Berbea emoten deutso Ongi Etorri Errefuxiatuak Zeanuriko taldeko kideari. Honek mahaigaineratuten dau mozinoaren helburua dala Zeanuriko Udalak konpromisoa agertutea Zeanuri babes herria izateko, ajente aktiboa izateko, aurretik joateko, itxaroten egon barik errefujiaduak noz etorriko, sensibilizazino mailan prest egoteko.

Alkateak erantzuten deutso Zeanuriko Udalak ateak zabalik daukazala herritarrentzat zein kanpotik datozanentzat. Lagunduteko dagoala, ipini beharrekoa ipiniko dauala. Baina beste erakundeak egiten eta esaten dabenaren zain dagozala, honeek ondo dabizalako.

EH Bilduk bat egiten dau aurkeztutako mozinoan esaten danagaz. Konpromisoa ezin bestekoa dala, ez garala beste erakunde batzuen pentsura egon behar, aurrea hartu behar bada hartzeako prest egon behar dogula.

Mozinoa onartuten da EH Bilduren 4 aldeko botoakaz, EAJ-PNV abstenidu egiten da.

7.- EH Bilduk aurkeztutako mozinoaren eztabaidea eta onarpena: Agur eta ohore Mohamed Abdelaziz.

Alkateak dino bat egiten dabela doluminak emoteagaz, baina palestindar banderea ez dala balkoian eskegiko. EH Bilduk onartuten dau EAJren planteamentua azken batean mozinoari baietza emotea dalako.

Danon adostasunagaz onartuten da.

8.- Erregu eta galderak.

EH Bilduk hurrengoak galdetuten dauz:

·         Pleno deialdiak publikoak izatea onartu zan, luminosoan zergaitik ez da agertu?. Tabloian/paneletan ipini dana eta zinegotziori egin jakun deialdia gauza bera dira. “… Batzarrera etortea ezinezkoa badozu, behar dan epean Alkatetza honetan parte emon”, hurrengo baterako kontuan izan beharrekoa da.

Alkateak erantzuten dau luminosoagaz arazoren bat egon dala.

·         2016ko maiatzaren 13ko aktan aitatuten da, Kultur Etxeko gela nagusia dala eta “bariku batzuetan ekintza batzuk antolatuta egozala gela horretarako”, zeintzuk dira ekintza horreek?

Kultura zinegotziak dino ez dala gogoratuten. Eskatuten jako argitutea. Halan egingo dala dino.

·         Akta berean galdetuten dau “noz publikauko diran arkitektoa aukeratuteko oinarriak”, erantzune izan zan “hamabost egunen barruan”. Epe hori pasau da baina ez da egin, noz egingo da? Alkateak dino “aste honetan, seguramente, amaituko dogu eta martxan ipiniko da”.

·         San Isidroko feriarako erosi zan txokolatea dala eta jakin gura da zer egingo dan saldu barik dagozan tabletakaz. Kultura zinegotziak erantzuten dau udalekuetan edo eskolan banatuko dirala. Zenbat dagozan galderari erantzuten deutso 40-50 bat dirala.

·          Ander Manterolaren liburuaren salmenteari buruzko galderari idazkariak erantzuten deutsa oso gitxi saldu dirala.

·         Brigadako langileen eta aguazilaren oporrak ordezkatuteko lan boltsa erabiliko dan galdereari alkateak erantzuten deutso baietz eta seguramente brigadan beti hiru langile egongo dirala.

EH Bilduk hurrengo eskaerak mahaigaineratuten dauz:

·         San Isidroetako aurrekontu zehatza eskatuten da, sarrerak eta gastuak.

·         Kultur batzordearen 2016rako aurrekontua eskatuten da.

·         Web orria eguneratu beharra azalduten da: azken akta 2011-11-24. Erantzuten jako astiro baina horretan dabizala.

·         Bizkaibus-eri eskatutea Galdakoko ospitalean zuzenean doan autobusak be paradea eukitea, behintzat, beheko partean. Ontzat emoten da.

·         Diputazinoari eskatutea berea dan bidean, jauzteko arriskuan dagozan zugatzak dirala eta neurriak hartzea.

Herritar batek berbea eskatuten dau adierazoteko Ur Partzuergoan esan eutsiela ez dabezala putzu septikoak garbituko. Gestinoa egin arren 212€ ordaindu behar dirala. Ez dauala ulertuten saneamentua ordaindu arren zerbitzu hori ez eukitea. Alkateak erantzuten deutso Consorcioak garbituten ez dauana udalak egiten dauala. Horretara herritarrak dinotso holan egin ezkero birritan pagetan dala, bata bakotxak ordainduten dauan fakturea eta bestea udalak herritarron diruagaz. Alkateak esaten deutso “zure etxean saneamenturik ez dagoan bitartean, saneamentuea ez pagau”. Consorcioari eskatuko deutsiela saneamentua ez dauan bitartean, ez kobretako.

Galdetuten jako zeintzuk diran saneamentua daukien auzuneak. Altzua, Altzusta eta Plazea dirala dino.

Alkateak dino ekainaren 25erako herritar talde bat Fernando, praktikanteari, omenaldia antolatuten dabilela eta udalak bertan parte hartuko dauala plaka bat emonaz danon izenean.