2019ko otsailaren 8ko ez ohiko plenoa

Bertaratuak: Eusebio Larrazabal Olabarri, Eider Ajuriagerra Arana, Felipe Agirrezabala Agirrezabala, Eneritz Iza Uriarte, Gurutze Etxebarria Zuloaga, Zedarri Jauregi Manterola, Irati Urien Ortuzar, Arkaitz Estiballes Ormaetxea, Pedro Lejarza Ibarrondo.

Idazkaria: Ana Mari Bengoetxea Lejarza.

1. 2019ko Aurrekontuaren onarpena horrela badagokio.

Alkateak berbea emoten deutso EH Bilduri 2019ko Aurrekontuari aurkeztu deutsozan zuzenketak azalduteko.

(Aurkeztutako zuzenketak osotasunean ikusi gura izan ezkero, eskatu EH Bilduko edozein kideri).

EH Bilduk bi arrazoi nagusi emoten ditu osoko zuzenketa aurkeztuteko: ekarpenik egiteko aukerarik eza, eta beste arrazoi batzuen artean legeak ezartzen dituen epeak ez betetea. 2019ko Aurrekontuaren txostenak akatsak dituela be azpirratu gura dau EH Bilduk, eta EAJk esaten dauanean 2019ko Aurrekontu proposamena 2018ko Gastu Errealetan oinarrituten dala, ez dala holan. Arrazoiok justifiketako EH Bilduk adibideak emoten ditu kasu guztietan.

Jarraituten dau EH Bilduk galdetuz ia inbersinoak egiteko dirulaguntzak ziurtatuta dagozan, eta dirulaguntza horreek heldu ezean inbersinoak egingo diran. Honegaz lotuta adierazoten dau EH Bilduk aurtengo inbersinoen atala igazkoaren kopia bat dala, eta igazkoan %70a baino gehiago ez zala aurrera eroan; hori dala eta, ia aurten beteko dan jakin gura dau. Gaiagaz amaituteko EH Bilduk dino inbersino honeen proiektu teknikorik ez dala aurkeztu, eta inbersinoen artean besteak beste faltan botaten dau etxebizitza sozialareko diru partidarik ez egotea. 

EH Bilduk 2019ko Aurrekontuan be proposatuten dau brigadarako beste lanpostu bat sortutea, beharrizanak halan eskatuten dauelako; eta akordazoten dau igazko aurrekontuetan be proposamen bera egin ebala, eta are gehiago, EAJk onartu egin ebala nahiz eta ez dan bete.

Beste urte batez herrirako plan orokorra falta dala dino EH Bilduk, eta plan orokor horren barruan arlo bakotxari jagokon plana: saneamendua, baso ustiaketa eta birlandaketa, elektra indarra, irisgarritasuna... Plan guztiak parte hartzea euki behar dabela oinarri dino EH Bilduk, eta ez dala denpora laburrera begitu behar, epe ertain edo luzerako ikuspegia euki behar baino.

Arkitektoa dala eta jarraituten dau EH Bilduk esanez ez dagoala ados partida honek suposatuten dauan diru gastuagaz, 37.500€ urtean, eta horretatik aparte 30.000€ lan teknikoetarako. Akordazoten dau beste batzutan esan daben lez posible dala gastu hau bajatutea arkitektoaren kontratua berraztertute (eta ez orain egiten dan moduan aste birik baten, martitzenetan, ordu bi gitxiendiz), zein arkitekto baten ordez aparejadore bat kontrataute.

EH Bilduk dino Aurrekontuan dirulaguntza batzuk emotea aurreikusten dala, honeetako batzuk ordenantzetan oinarrituta dagozala baina beste kasu batzutan ez dagoala ordenantzarik; hori dala eta, galdetuten dau ordenantzarik ez dagoan partidetan zeintzuk izango diran dirulaguntzea emoteko irizpideak.

Amaiera aldera EH Bilduk proposatuten dau 2018tik gelditu dan erremanentea erabili beharko litekela (legeak halan gomendatuten dauelako) lehenengo eta behin Udalak deukozan mailegu biak kentzeako; beste alde batetik hornitzaileakaz zorren bat euki ezkero ordainduteko; eta epe ertainera begira ezinbestekotzat joten dauen herriko saneamendua egiteko plan orokorra aurrera eroateko.

Amaituten dau EH Bilduk esanez, herritarrakaz egin beharreko Aurrekontua izan beharko litekela, prozesu parte hartzaile baten bitartez eginekoa.

Alkateak hartzean dau berbea eta EH Bilduk esaneko puntu batzuri erantzuna emoten deutsie. Egoerea ez dala “bollantea” baina inbersino batzuk egingo dirala dino alkateak. Etxebizitza sozialerako partidarik ez dagoela dino alkateak, gasturik ekarriko ez deuskulako eta proiektua martxan dagoela be badino. Jarraituten dau esanez egia dala igaz onartu zala brigadan beste langile bat kontratetea baina ez dala egin, halan da be zeozer egin beharko litekela dino alkateak. Saneamendua osotasunean egitea ez dala posible dino alkateak, egoera ekonomikoa ez dala hain ona esanez; Elizondokoa amaituko dala dino eta sarea handituten hasiko dala Ipiñaburutik, eta zatika egingo dala, auzo batekoa martxan dagoanean beste bategaz hasiko dala. Esaten dau erremanentean dagozan gitxi gorabeherako 200.000€ inguruetatik zati bat saneamendura joan beharko dala, eta kontuan hartu beharko dala be bai Partzuergoak egingo dauan aportazinoa.

Ustiaketa dala eta teknikuen eskuetan geldituten dala dino alkateak.

Elektra indarraren inguruan planen bat egin beharko dala dino alkateak, eta irisgarritasunari jagokonez dino udal bulegoak zein kultur etxeko igogailua egin dirala, gitxi gorabehera 400.000€ko gastua suposatu dabena. 3. adinekoakaz plangintza finkoa euki barik baldintzetara moldatu beharko gintekezela pentsetan dau alkateak. Uger egiteko lekua dala eta aurrera eroateko exijentziak betetea gatxa dala baina zeozetan badabizela dino alkateak. Herriko bideen plana eginda dagoala dino alkateak. EH Bilduk dirulaguntzak emoteko ordenantzea egotearen beharrari alkateak erantzuten deutso gauza batzuetarako ordenantzea egotea inposiblea dala.

EH Bilduk dino legegintzaldia egiteko modua inprobisazino hutsa izan dala eta orain be emon diran erantzunak entzunda susmoa deukola bardin segiduko dala.

Botazinora joanda, Osoko Zuzenketa ez da onartuten, EAJk kontrako 5 boto emoten deutsozalako.

EH Bilduk alde egiten dau, 4 botogaz.

EH Bilduren Zuzenketa Partzialakaz jarraituten dabe gero eta banan banan aztertuten dira. Hainbat partidari buruz azalpenak eskatuten dire. Beste alde batetik, botau beharreko zuzenketak be eztabaidatuten dire; hauterariko batzuk onartu egiten ditu EAJk, eta beste batzuk ez.

EAJk onartuten dauz:

- Egoitzetan dagozenentzako laguntzak partida Familiei dirulaguntzak izatea.

- Elektra indarra, erregaien hornidura eta telefonia arloan enpresa bat baino gehiagori aurrekontuak eskatutea eta aukerarik onena hartzea.

- Eraikuntza publikoetako sostenibilidadea (argia, berogailuak...) optimizatzeko estudioa egitea partida sortzea onartu egiten da EAJko zinegotzi bat abstenidu arren.

EAJk ez ditu onartuten:

- Ondasun higiezinen gaineko zerga partida gehiagotzea, kultorako ez diren eraikuntzak besteon moduan zergak ordaindutea hain zuzen be.

- Gaztetxearen instalazioa partida kentzea, azalpenak eskatuz eta herriko gazteentzako leku bat egotearen alde egoteaz gain gaztetxearen konnotazinoak argi itxiz, besteak beste.

- Hirugarren mundurako laguntzak partida gehiagotzea, onartuta dagoen Aurrekontuko 0,7a aplikatuz.

- Udalbiltza partida sortutea.

- Gorbeialdeko kuota kentzea, arrazoituz batetik partida zehatz bat sortuten dalako turismo arlorako; eta, bestetik, kuota hau ordainduteak ez deukolako eraginik herrian, euki beharko leukenean.

Ez ohiko pleno amaieran, zuzenketa guztiak aztertu ostean 2019ko aurrekontua onartu egiten da EAJren aldeko botoakaz. EH Bilduk kontra botetan dau, 4 botogaz.